BADRI RONGSA·AWE MONDOLINI ONG·BANI GIMIN

Badri Rongsa A∙we Baptist Mondoli abachengao 1960 bilsi-mango Krima 5-ni Simsanggre Mondolini Circle-2-o chongipa Kristan bakrimani gitasa ong∙e Lt Polmo Marak aro Lt Ponon A. Sangni nokdang gegnisanchim. Indake ong∙oba napola mangipa aro nokdangrang baririkrikengani gimin, chongipa Kristian bakrimaniko, jensalo nokdang ge-6 ong∙aha uako 1976 bilsio January jao Simsanggre Mondolini Sobha Sampalgreo ongmitingo bipek songaha. Ua bilsioni abachenge adita bilsirangna Badri RongsaA∙we Mondoli bipek ong∙e tangbaaha.

Chongipa Kristian bakrimgipa giljako bipekni gadangona radooba uamangni gisikni bidingo Kristian gita janggi tanganide saoba rebae uamangna kam kakuja dipet silroroani dongjaengchim aro indaken dongengachim. Bilsi 1971-o jensalo Shri Diredro A. Sangma aro uni nokdang Rongsa A∙we songona rebae, ua procharok gita antangko onkange adita bilsina Isolna kamko kaonisa bipek gilja kasne kasne silrorona abachengbahaa. Ua mamong Mondoliko ra∙na niksamsoe banga bilsirangna rake kam ka∙engon uko see jotanina Shri Clamex D. Sangma dakchakaha. Uni rake kam ka∙anichi napolgipa bangrikrikaha aro nokdangrangba baririkrikaha. Ia napolgipa aro nokdangrang bangrikrikani mamong Mondoliko ra∙na gita obostachi draataha. Uni gimin Mondoli gita saoba Isolna on∙tanggipa mandeko am∙e Theological College-chi watatna manderangko amsandina committeerangko don∙ataha. Dongimin committee-rang sandienba Shri Gading Ch. Sangmani depante Shri Lakish S. Marako man∙aha aro indake Harding Theological College-ona poraina gita bilsi 2007-o poraina watataha.

Poraina watata mangipa mande matchotbaon, ABDK-ni p’lak nanga lekkarangko Mondoli ra∙na gita on∙aha aro on∙gimin lekkarangko chuongnikaha aro mamong Mondoli songna namnikaha. Bonkame, Shri Lakish S. Marak skanggipa pamong ong∙e, Krima III-ni jakrikra Rev Julian Murphy N. Marakchi June 7 aro bilsi 2012-o chugimikgipa mamong Mondoli ong∙aniko songaha.

Ua somoioni dipet Badri Rongsa A∙we Mondoli, bipek ge 3 aro napola mangipa sak 465 da∙o mamong Mondoli ong∙e janggi tangbaenga. Uan Nongal Bibra ajajolni District South Garo Hills,Meghalaya, Indiao donga.

Niksamso·ani: Saksa sakgipinna mamung pangchakaniko donggija ka.saana aro Isolna aro gipin janggi gnanggiparangnaba bilake dangdikna Sastro-o pangchake dalroroenggipa beberagiparangni songsalko rikna; jeon iana iako indake daken:

(a) Olakianiko ningtubatate (b) Aganprakaniko apalbatate (c) Sninggipa ong.anichi bilakbatate (d) Bakrimaniko su.ubatate (e) Dangdikaniko apalbatate

Nama Kattana niksamso·ani: Kristo Jisuni Mondoli Badri Rongsa A·we, Baptist Mondoli song Rongsa A·we, P.O & P.S Nongal Bibra, South Garo Hills, Meghalaya India, minggittam Nama Kattako gipatanina niksamsoaniko dona.

(a) Aganprakna: Gimaenggipa janggirangna Jisu Kristoni Jokataniko aro papko kema ka.ani Nama kattako aganprakna 

(b) Skiprakna: Gitel Jisuni ge.etani na bame beberagiparang aro beberagijagiparangna skiprakna

(c) Sokatna: Jerangonan Nama Katta aganprakengani sokangkuja uanona Isolni Katta baksa missionarirang aro evangelistrangko watatana.

Miksongani: GitelJisuni Mondoli Badri Rongsa A·we Baptist Mondoli Jean chugimik mamong Mondoli songaha kamao gita miksonganirangko don.a

(a) A·gilsakni skisretgiparangko aro namgijarangko warachakna

(b) Gimikni gita songsalo nama dingtanganiko rabana

(c) Songsalo aro Mondolio namgipa aro kam sapgipa dilgipako ongkatatna

(e) Isolni missionni kamo bakrime gimaenggipa janggirangko uona rimbaana

(f) Dingtang dingtang dangdike on·ani bewal gita Isolko rasong on·a

Nangnikani:

Gitel saksan, Beberaa gesan, Napola changsan